ZOMI CHRISTIAN FELLOWSHIP, DELHI

By ~ Samuel Samte

Tunai a Delhi High Court thutanna khat in, mi tamtah, adiahin Sahkhua tuamtuam lamkaite- patausah leh lungbuaisah mama hi. Delhi HC in “pasal leh pasal (sapten- gay), numei leh numei (sapten- lesbian) nu-le-pa bang a kipawlna pen- mawsah/gawt ahinon tasih ding hi” chin Dt.3rd July nin thutan hi. India a mikhialte mawpaibu, IPC Sec.377 na in tambang a- ngaina loutah a gamtate a mawpai guah hilou in damsung suangkul khum thei hi.

Hih IPC Sec.377 ahileh, 1860- Britishten a lal lai ua anajah/jui uh, India injong hoisa a, ana kijuitou peh ahi.

I Bible ua “Sodom leh Gomorah” mite siatna bang gamtat hoilou, Delhi a khaam ahinon tasih ding china ahi.

India a Christian, Muslim, Hindu leh Sikh lamkai minthang tuamtuam ten tami Delhi HC thutanna pen, Pasian silhuat mama khelna namkhat ahi, chin doudal pai uhi.

Etsahnan- India a Hindu Siampu minthang leh influential mama- Baba Ramdev (Yoga Guru) in Supreme Court kung ah- hih Delhi HC thutanna Chou(challenge) na in Special Leave Petition pia hi.

Aman - hibang a pasal-pasal, numei-numei kipawlna (ji le pasal a kineina) pen, mihingte natna chikhat ahia, Spain gam a mipil-misiam, mihing lungsim ngaituana lam a experts ten jong tambang ngaidan anei thu uh gen hi. Tambang natna/gamtat (sapten- homosexuality) pen suhdam thei ahi, chin gen hi.

Banah- Christian lamkai pawlkhat leh Akal Takh kichi, Sikh Sadu te kivaihawmna lianpen injong Delhi HC thutanna a pomlou thu puang ua, adiahin Sikh Sahkhua sungah tambang gamtat umthei ngailou ding chi ua, khoveel pumpi a, Gurudwara umna teng ah hibang a gamtat kilawmlou pen khaam ahi ding hi chi’n nasatah in dal uhi.

Tualeh, Muslim sakhua injong hibang gamtat, nasatahin dalsawm. All India Muslim Personal Law Board kichi, India a daan thu a kivaihawmna pawlpi in, tambang gamtatpen, sildihlou, sakhua toh kikal, ngaina daan hilou chi’n puang.

Tunai in, ka lawmte toh tamthu a ngaidan kaki kupna uah gintat loupi’n ngaidan tuamtuam ka jakhia hi. Debate dan a kaki dawntuah jiah a diai, kachisim a, lawmpa khatin, ‘Ken Delhi HC thutanna ka pom a, hoi kasa mama hi. Mihing te khatbeh akibangchet I um lou mabangun, I utna uhjong tuam thei tham hi’ chi hi. ‘A mong mong in, David leh Jonathante na ki-iitna uh jong muangmaw huaina umthei hi’. A dang khat in, ‘hibang issue pen adiah in kipawlkhawmna, I Fellowship/church chite vel ah pilvang tah a etjui poimaw hi’ chi hi.

Bang hileh, kei ngaidan in, Sodomy (pasal leh pasal kipawlna, Gen.18-19 a Sodom leh Gomorah mite tatkhelna genna a kijang) pen, ganhing te lah ah umleh theisiam huai kasa a, mihing te gamtat din theisiam huailou kasa hi. Tunai a Gays ten thupitah a lampi ajui mabang un- tun, apomtheilou, ajadah ten lamlian juina nei jeel ta! Hip-hip! Hooray!

Bangteng hileh I Bible un, hun nunung chiang siltung ngeinailou, kidang tah tah hing tung ding, achi khu hing tangtung bang hi. Tuajiahin Society khat, Fellowship khat leh kipawl khawmna khat phot phot in hiina/dinna kichian tah khat anei dih hing poimaw ta in kathei hi.

I lah ua lamkai, Upa ten jong tammi tungtang a a ngaidan uh hing gial uleh dei um isah ka gingta hi.

God man Adam and Eve, not Adam and Steve! (Pasian in Adam leh Evi bawl, Thangboi leh Lalboi hilou) No animal commits to this shamless act! (Ganhing nasan in jong hibang thangtat in talou)

Articles Christianity, Homosexuality