ZCF’s Revival Crusade 2011
ZOMI CHRISTIAN FELLOWSHIP: DELHI
(October 28-30, 2011)
- Rev. J.M. Ngul Khan Pau
Delhi ZCF ah hun zang ding cih thu chairman Pa Swan Za Lian tawh facebook panin kihona hong taksuah ahih manin Topa tungah lungdam thu ka puak masa hi. Fellowship in hih hungeelna adingin thungetna kum nih sung khawng na phawk khin uh ahih manin Kha Siangtho ompihna kithei ciat hi. Kingfisher vanleng tawh Guwahati panin New Delhi dong ka leng a, New Delhi vanlengtual thak na thupi mahmah ahih manin gamdangte tawh kibangin na etlawm mahmah hi. Pastor Jangkholun Mangte, Mission Committee ading sumkem Cing Neih Kim leh Gin Sian Lian in amau mawtaw hawlin hong na dawn uh hi. Vanleng tungah thungetna leh Philippi laibu simna hun hoih ka ngah thei hi.
Tutung Revival Crusade thulu dingin Pressing on cih Philippi 3:12 panin kila hi. Free Church, Methodist Pawlpite biakinn ah kikhopna a neih zawh uh kum sawmnih cing khinzo hi. Tua hangin Free Church pawlpi mite’n zong amau pawl mi bangin tuat uh hi. Khuahun vot hiauhiau tawh Delhi adingin hun nuam penpen laitak-a zin kha ka hihna ka phawk hi. Gennop tampi a om hangin genloh theihloh pawlkhat hih anuai a bangin kong gelh hi.
1. Thungetna: Thugen mite’n Pawlpi leh Fellowship khawng ah thugen dingin i pai ciangin thungetna tawh limtakin ki-apna a neisa ana om leh i thugen ciang zong kithei hi. A lei nip leh taak cih thugen ciangin theihna kinei hi. Delhi ZCF zong lei nip tampi omna ahih manin thugenna hun khempeuh haksatna om loin ka zo thei hi. Amau sungah anntang thungetna a zang thei nupi papi a kipan numei naupang tamsim pian uh hi. Thungenngen innkuan leh Pawlpi pen kilamdanna om teitei hi. Nu leh pate bekin anntang thungetna nei hi loin naupang pawl khat zong mabung thei uh ahih manin manpha kasa hi. Khitui tawh khaici tuh mi bangzah hiam omna munah kizat pen i pumpi a gim hangin i kha tawldam mahmah hi. Thungen taktak mite tate zong amau sungah Pasian dangtakna nei uh hi. Nu leh pate’n ci bangin na al uh ahih manin tate zong nuntakna tui hong zong uh hi.
2. Zintunna leh giahna: Zintunna zong YMCA Tourist Hotel ah hong koih uh a, room nuam mahmah ah ka tawldam theih ding hong hanciampih uh hi. Kikhopna hun nitak lam nai 2:00-7:00 ahih manin tawlngakna hun hoih tak ka nei thei hi. Khatveivei u leh nau kiangah i giah nop hun a om hangin hih bangin hungeelna i zat ding ciangin giahna khawlna a tuam ahih leh thungetna leh tawlngakna deih bangin kingah theizaw hi. YMCA Tourist Hotel pen CBCNEI ah kasep lai-in Delhi ah khualzinna ding kihau mahmha a, tua hun a kipan ka zintunna mun ahi hi. Tua ahih manin sumbuk vanleina ding leh vak pakna dinga kiim leh kiang ka theihsa hi. Hih bangin giahna mun nuam hong vaihawmsak uh ka lungdam mahmah hi.
3. Phatna leh Biakpiakna: Khangnote in thungetna taktak tawh la hong makaih uh ciangin Pasian phatna hun zong thupha tampi kisang hi cih ka phawk hi. Tutung hungeelna ah phatna leh thugenna bek kikoih a, thudang la dang gen ding kikoih vet lo hi. Tua hangin biakpiak phatna nai lang panin minute sawmli sung bang kinei ziahziah hi. Suakta takin Pasian a kiphat ciangin thugente adingin vaipi khat kikhin zo cih kithei hi. Mitsi kawmkawm in khangnote’n Topa hong phatpih i muh ciangin, lungkimna hong lian mahmah hi. Topa adingin khitui, hun, sum leh pai i sup ngam ciangin Topa in thupha tawh hong thukkik teitei hi. Pasian min tawh sum’ ngam leng tawntung adingin metna lampi hi hamtang hi. ZCF a nop mahmahna bel Zomi sunga pau nam tuamtuamte’ la kisa ziahziah ahih manin vangam malep lim khat bangin ka tuat hi. Pasian sungah i ki-it theih kei leh leitung thu ah ki-it ding haksa mahmah leh kilawm hi. Hih bangin Topa itna leh phatna pau cikim tawh i neihkhop ciangin, “En un, sanggamte pumkhat suakin a tutkhawm uh ciangin bangzahin hoihin nuam ahi hiam” (Late 133:1) ka phawk hi. ZCF Khangnote’n Phatna La video album a bawlsan laitak uh ahi hi. Hong khahkhiat ciangin na lei leteh na kisik het kei ding hi.4. Pasian thu mah delh tangtang: Delhi khuapi a liat mahmah hangin Pasian bia dingin hong delh tangtang nupi papi leh khangnote ka muh ciangin “nuntak gimnam” kasa hi. Etnopna, gualnopna leh kikawmna sum leh pai tam beina khuapi sungah biakinn lam hong zuan teiteite in lungsim hong lawng mahmah hi. Hih bangin Pasian a zong leh biakna pia ding hong kizui khangnote ka et ciangin, “Amaute kalsuan Pasian mit ah bang zahin a etlawm tam?” ka ci hi. Sangkah laisim lai-in Pasian thu tua zah takin limsak ding hi kei cih bang kigen thei hi. Nu leh pa pawlkhat in, “Delhi ah laisim dingin om na hih manun lai mah hong sim tangtang unla, kikhop nangawn a hunkhop ciang hong thei un,” ci-in a tate uh hilh thei hi. Ahi zongin Pasian loin lawhcinna kuitung ding omlo hi. America gama Zomi te’n zong nai khat nai nih amau mawtaw hawlin kikhopna a delh tangtang uh leh e’n zong amau mah bangin i hanciam thei hi. Pasian delh tangtang nading ‘hun’ na neih kei leh a tawntunga a kizangtheilo ding nate a delh na hi ding hi
5. Revival Hungeelna tawh kisai: Hotkhiatna thu tawh kisai ka lim gen loh hangun, kha lamah dangtakna om cih a kitheih manin Topa tungah ki-ap dingin sapna kibawl hi. Tua bang ciangin mi pawl khat in thupukna bawlin kitheician nei pawl khat om hi. Mi a phazah ka theih loh hangin tampi mahmah in khut zakin Topa tungah kipiakna nei uh hi. Tua tawh kitonin pawl khat zong ki-apthakna nei uh hi. Jesu nung ken zui ning a cite sapna in hih la kisa a, kikhawm teng cih theih phialin Topa kong zui ding cih pulakna in ding uh hi:
Hingun zuivaai, i Mang Jesu suulnua
Apeina tan ah a suulnua zui va ui
Zui vaai, zui vaai, Jesu nua ke’n zui vaang
Ama’n hing puina tan ah ke’n zui peh vaang
Cidam lo a hong kikhawm mi pawl khat in zong cidamna ngah uh hi. Topa thu in tawntung a si i kha nuntak tawntungna hong piak theih leh i leitung pumpi zong damsak zo mahmah cih kimu hi. Khangno chairman sem Tg. Nelson Thang Khan Lal zong a lum cip kim lai Pasian min tawh hih program adingin thokhia in la makai in hong pang a, Topa damsak ahih lam ama kam mahmah tawh kipulak hi.
6. Khris hangin supnate zong metna: A tawp nitak in chairman Pa Swan Za Lian inn ah Pastor Jangkholun makaihna in hun kizang a, tua laiah tutung hunzatte ah phattuamna tomcikcik genna hun kizang hi. ZCF nungak khat in Qatar Airline ah air hostess sem dingin vai a sai thu leh exam na, kam tawh dawnnate ah zong cing khinzo ahihna gen hi. Ahih hangin a cidamna ah themkhat kisam citciat hi. A siavuanpa in, “A cidam na lawm nu X-ray la ni, tua pen nang min in report kong gelhsak ding hi. Banghang hiam cih leh hih nasep na taan ding pammaih lua hi” ci hi. Ahih hangin hih nungaknu in Pasian zahtakna hangin, “Zuau tawh hih nasepna ka ngah sangin ngahloin omzaw ning,” cih khentat a, tua nasepna (thudik a deih man bekbekin) taan ngam hi. Leitung mite muhna ah haihuai tawh a kibat hangin Topa zahtakna tawh thudik a teelzawk manin a lungdamna leh a lungkimna thu hong pulak hi.
7. Thugente tomlakna: Tutungin thugenna hunpi nga vei ka zang hi. Thugenna tomlak hih a nuaiah kong koih hi. Topa thu leh la ah i khantohna, i kalsuanna ahih ding deihna hi.
Date: 28th October 2011
Hun Khatna : 2:00 – 4:00 P.M.
Thulu: Pressing On
Text: Philippians 3:12-14. Mun thum lam manawh in mainawt ding hi. Tua thumte ahih leh:
(a) Backward : Forget the Past (Nunglam Mangngilhna lamah)
(b) Forward : Move forward (Mailamah)
(c) Upward : Upward relationship (Tunglamah)
Hun Nihna : 5:00 – 7:00 P.M.
Thulu: Jesu a Nawkkha Bek Maw, A Nei?
Text: Luke 8:41-56
(a) Haksat thuakna hangin Pasian kiangah tung hi (Aneu 41-42)
(b) A lawng mawkmawk leh upna tawh a lawng (Aneu 42-44)
(c) A um mi in damna ngah hi (Aneu 44-46)
(d) A dampih mite kipulak uh hi (Aneu 47)
(e) A kipulak mite’n thupha ngah uh hi (Aneu 48)
(f) Ahitheilo ding upna in hitheisak hi (Aneu 49-56)
Date: 29th October 2011
Hun Khatna: 2:00 – 4:00 P.M.
Thulu: Pasian in Lametna Hong Nei Hi
Text: Luka 13: 6-9
(a) Theikung kisuan (Aneu 6)
(b) Theikung gahlo (Aneu 6)
(c) Theikung etkhiat (Aneu 7-8)
(d) Thukhenna thuak ding (Aneu 9)
Hun Nihna: 4:00 - 6:30 P.M.
Thulu: Mailam Nawtin Tai Ni
Text: I Kor 9:24-29
(a) Aman tupna, ngimna nei (Determination) (Aneu 24)
(b) Amah kikem, ki-uk hi (Discipline) (Aneu 25)
(c) Aman paina lam nei (Direction) (Aneu 26)
(d) Ama deihna nial (Denial) (Aneu 27)
Date: 30th October 2011
Hun: 1:30 - 3:45 P.M.
Thulu: Mainawt Ni
Text: Phil 3:1-21
(a) Pumpi Si leh Sa muantak lo (No confidence in the flesh) (Aneu1-3)
(b) Gamtatna saantak om lo (No conduct good enough) (Aneu 4-7)
(c) Kris lo deihzawk ding om lo (No choice better than Christ) (Aneu 8-10)
(d) Cihtakna, thudikna (Honesty) (Aneu 11-12)
(e) Hahkatna, Kuhkalna (Hardwork) (Aneu 13-14)
(f) Gamtat sangzaw, Siangzaw (Holy standard) (Aneu 15-16)
(g) Sangzaw ngiimna (Higher focus) (Aneu 17-21)
Thukhupna
Elim Resource Center adingin sum leh pai tawh hong mapang mi bangzah hiam om hi. Pawlkhat in zong thungetna tawh ka hih theih bangbangun kong pang ding uh hi, hong ci uh ahih manin tha ngah mahmah in inn lam ka zuan hi. Topa min tawh hun hoih dang ngahkik ding lamen in thungen ni ci-a kikhen theih pen manpha kasa hi. Topa min tawh i tunna mun ciat panin mainawt thei dingin Ama Kha Siangtho makaihna eite tungah hong tung semsem hen. Mimal nek leh tak lamah hong deihsakte hangin lungdamna lian mahmah hi. Minthanna, pahtawina leh kipahna Topa tungah ka pia hi.
Recent Comments