Upa N Chinsum

“A hoihzaw gam zuan a zin, Gamdai nisatna ka pai;
Pa, Na khut in honlen in, Honpii honhuai zel in.” - Ira D Sankey.

Ahoihzaw gam, Vangam zuana zin lam I pailai in I biak Pasien in A khut hat-a honglen in hong tonpih a… Delhi Zomi Christian Fellowship (DZCF) in kum 25 mel mu ahita. Thupi mahmah maw. Hun nuam hun haksa-a hong taisan/ ensan ngeilou I biak Pasien minthangta hen! Ama’n Delhi Zomite hichieng hong tunpih lai in, DZCF’ hun paisa, tuhun leh mailam hun ngaihsut louh theihlouh thu ahi. Tua’man in tawm kikum dih ni.

HUN PAISA: A’ khawvak mu masalam mi bangzahhiamte’n 21 January 1972 in, I Silver Magazine uh Editor, T. Zamlunmang Zou pianna khua, Daijang khawta, Manipur CCpur district ah Zomi National Congress (ZNC) ana phutkhia ua, tua pen ei Manipur Zodawn suakte laka Zomi (Zo suan) nationalism hong kipatna hidan in chiamteh theih hi. ZNC president leh secretary masa Pu T Gougin, leh Pu Semkhopau Samte @ Pu SK Samte te ahi uh.

ZNC piannung kum 10 pai manlou in Jawaharlal Nehru University (JNU), New Delhi akipan Pu S Thangkhangin Ngaihte leh Pu LS Gangte te’n M Phil hon zoukhia uhi (1979 in). Nuam. Pu Ngaihte dissertation, History of the Zomi of Mizoram and the surrounding Areas: Aspects of pre-colonial society chih hia; Pu Gangte aa, Zomi polity in transition: A case study in Manipur chih ahi hi.

JNU akipan graduate khethei I om tawh kiton chih theih phial in Pu N Gouzagin s/o Pu Enpum Naulak (RIP), Outer Manipur Parliamentary constituency apan MP hongching viahviah – 7 Canning Lane, New Delhi ah solkar-inn luahsak in om hi. 7 Canning Lane pen India khawpite laka Zomite Hq. masa; ALZOSA (All Zomi Students’ Association) bang, DZCF bang pianna mun, mun poimawhtak ahong hita.

DZCF a Secretary masa Pu H Thangzamuan in Annual Report, 1982-83 a gelhna ah hibang in taklang (vide, ZCF Delhi Secretary’s Annual Report 1982-83 dated 4.9.1983):

The Worship Service at 7 Canning Lane was started by Zomi believers in Delhi on the 27th February, 1982. The main objective of the Fellowship service being a common sharing of believers in the Lord and group prayers and praises to God, it is believed that this Fellowship will enable the believers to strengthen one another in the Lord. Apart from aiming at glorification of God’s name and the extension of Christ’s kingdom, this Fellowship, it is believed, will bring the believers closer to each other.

TU HUN: DZCF kum 25 chingta. Ebenezer! Hiai santak ah, “Kum tenga Delhi Zomi kibehlap zungzung napi, DZCF a minkhum member bel kibehlap huthut hetlou…!” chih mi pawl khatte ngaihsutna ah om thei. A om diing mah zong ahi. Tua bang awlmawhna apailai in, DZCF Pawlpi leh a’ kakhia, inntuan Fellowship/ church te tungtang (muh theih kizopna) sang mah in I omkhakna tek ua mimal khat chiat leh siemtu Pasien kaal (muh theihlouh kizopna) feltak poimawh zaw hilou hiam, chi ut I hih chu. Mihing lampite’n TOUPA a suklungkim chienga TOUPA’N a melmate na-ngawn amah tawh kilem dia bawl hive’n! (Pau 16: 7). DZCF ah min khum mi khat I hithei (registered member), I hikei maithei (non-registered member). Ahihi hitaleh – think ‘Indian’ vis-à-vis ‘NRI’ - laizom Zomi, Zomi Khristian I hihna kidang theikei e.

Mihing’ lampi, a sep-le-bawl leh ngaihsutnate’n TOUPA lungkimsak zou vuallou hi (Rm 3: 9-18). Pa Pasien lungkimsak leh A lungkimna omsun Jesu Khrist ahi (Matt 3: 17). Tua Jesu Khrist, nang leh kei hinna naak (Kalvari tuihing lui), Pa Pasien in I pilna bang, I diktatna bang, I sianthouna bang, I tatna bang hiding in a bawlta (1 Kor 1: 30). Huai TOUPA vuak sidup leh dahsak Jesu Khrist’ sihna leh thawhkiikna na khelhna thoihna ‘thillat’ dia na zat/ hamphatpih peuhpeuh chieng in Pa Pasien in Tapa Jesu a A chisuan muta hi diing; Tapa Jesu tunga a lungdamna nang tunga a lungdamna hi diing ahi (Is 53: 10, Jak 1: 18). Toupa thupha maw! Van-inn paina lampi Khros; upna tawna, tua Khros a, Jesu tawh kikilhkhawm (crucified with Christ) mite in khentuam neilou uh, Khentuam neilou uh chichih-pauchihte, Fellowship chihte.

Rev Dr Hawlngam Haokip in IN SEARCH OF IDENTITY booklet Introduction, “The coming of Christ and the influence of Christianity has brought reconciliation and harmony between heaven and earth, Jews and Gentiles, and among people of different races, tribes, colour and creed,” chi’n pana, gen kha I sa hi. Dr Haokip in a gelhzom zelna ah, “It is sad to say that the Kuki-Chin, even though they claimed that they have accepted Jesus Christ as their Lord and Saviour and have been reconciled with God and love for Him, they have forgotten to reconcile with and love their own brothers which is an inseparable part of their life (Mark 12: 30-31). For a Christian, love should not only be vertical but also be horizontal,” chitou lai hi.

Hamsia banna sing Khros a Tapa Pasien in tatna naa a sepkhit nungsang, Pa Pasien lungsim ah, vanmi leh leimi kilem khinzou hi. Aw, hiai Thu, upna a san diing ngei! Khros atungzawng (vertical) in vantung mite leh leimite kilemna gen, apheizawng (horizontal) pen in leimi leh leimi - innsak-innkhang/ u-le-nau - kilemna gen/ ensak ahi, zong a kichi. Tua Khros laitaka kikhai Hondampa lamdang in ‘mihing’ a kichi khempeuh tatna (once and for all) semkhinzou hinapi, hih Tangthupha zata leh za nailou, huan, za napi-a a ummi (gingta mi) leh umlou mi ki-om chitchiat ahihman in, leitung mi nam (group) 2 phakiik chih thu ahi. ZCF leitung maikaih a omte leh Zomi sunga biakna pawlpi tuamtuam a member-te bel, Tangthupha za a um/ gingta/ zom vive hidan a ngaihsun I thahah ve, unau. I hikimna uh hiam?

MAILAM HUN: Jesu Khrist a-um Delhi Zomite, khat leh khat kinaiseem kawma TOUPA a kihihhat diing, Pasien min liansak/ thupisak diing, Khrist Lalgam keklian diing chia kum 25 paita-a patkhiak Fellowship, tuchia’n (singkung bang in ngaihsun tale’ng) zai/ ka pha simta; biakinn khat a kikhawm khawm theivual I hita kei. Leivui pana hong laamtou, Jesu hong itna hang bek ahi. Halleluijah! I kipatna Zogam lama pawlpi omsate mah DELHI a hongdin tiltil khawng, lemtang kibawlna, “I khangtou a ahi” chih phot tuak bang hi. I biakkhawmna pawlpi masa (DZCF a) tel zom lemtang I hithei, a.k.l. a kakhia pawlpi khat ah/ namdang Khristiante lakah biakna ah I tel ahithei. Bangleh-bangleh, “Zomi I hih mah nuam tei ei maw guai” chi’n, thil tengteng kituak taka gakkhawmtu ‘itna’ kisilhthuah in, I omna tek uah i Makaipa hong vaikhah - ‘The Great Commission’ (Matt 28; 18-20) eite lunglai luahtu 1na hi teitei leh maw! ‘Jesu’n hong vaksak…Nang na mun ah vak in, Kei ka mun ah’ chi I hih ngalsi leh. Selah.

Hichi’n ngaihsun le’ng. Nungzui masa Peter, Johan, Philip leh adg.dg.te’n zong Jerusalem biakinn tekteka a biakkhawm det louhpi uh! Ahilel gen in, Khrist leh muhtheih saptuam kizopna theichiente aa di’n gingtute sung ah “nou pawl, kou pawl” chia buai na’ng/ kidou na’ng om mahmah lou hi. Muhtheihlouh Saptuam (Abulpi) Jesu Khrist hia, muhtheih saptuam (Khrist a lamtouh) te ahihleh tuni a ‘saptuam’ chia lemtang kiguan a denomination min I kipiak tuamtuamte bang ahi. Hichi’n genteh le’ng: NE Express train tawnpi ah compartment tuamtuam om hi. Tua train compartment tuamtuam ah passenger-te enzuitu TT leh staff fel taktak duty uh. NE Express train tawnpi leh Jesu Khrist, huan, a compartment tuamtuam leh saptuam, hiai leitunga om zingzengte. I pastor-te uh leh TT-te, committee tuamtuama panmun lente leh train a staff-te…

Awle, ‘Nou/ Kou’ vachih khak baihlam mahleh, hiai thumal nihte zatdan I pilvan diing ahi. Khrist khen (divide)a a omlouh ziak in. “DZCF ‘te’ Pastor” chih sang bang in, “DZCF a ‘I’ pastor-pa” chidan bang in gen thei le’ng, bangzahta a neem in gawm simthu a kawk khazaw ale! “KWS ‘te’ chaplain” chih sang in, “KWS a ‘I’ chaplain,” etc. Khrist a innkuon khat, omna pawlpi tuam zekzek ziak khawnga tuampi banga kimuh & kidouna omthei zel pen setan lungtup tangtunna khat ahi, unau. ‘Diabol/ Setan mun awn kei un,’ chih gelh ahi. NE Express a tuangte kimidang etlou, Vangam zuan ‘Khrist Jesu’ um pawlpi mite kimidang et thei zelzel – setan pil sa ing! Setan lutang bel khet sidupsa ahive, unau; mun awt ahihchia’n a che-kin sim chih thu! Sanggam it, a hoihzaw gam zuan I zinlai in, anu’a Toupa Jesu kammal I ngaihsun phathak tek di ua’m –

“Guta zaw gu diing leh hihlum diing,
leh hihse diing lou in a hongpai kei.
Kei zaw hinna a neihna diing ua, tampitak a neihna diing ua hong Ka hi.
” (Jn 10: 10).

Food for thought: 1995 kum a WCBS, Portland, Oregan (USA) apan “When the World of Zomi changed” chih thulu tawh Doctor of Missiology na zoukhia, Rev Dr J M Ngul Khan Pau in, “The Church today needs to be aroused from sleeping, each member should thirst and hunger for the filling of the Holy Spirit. If not, we cannot live victorious and will not experience abundant Christian living. If we are true salt of the earth our life will create thirst in the lives of others with whom we encounter everyday. With our best efforts, planning and strategizing for church growth, working more than ever and exhausting ourselves in service, we fail to see the anticipated results. We don’t understand why and what more should be done?” chi (Baptist News, April-June 2004 issue, editorial).

Sia Paupu in tua editorial sung mah ah, “‘Even after rapture when the Spirit will be taken up into heaven,’ someone said, ‘some churches will still be having their services and not feel the difference.’ If this is true, then we are trying to accomplish the works of the Lord by our own strength without the help of the Spirit. It is no wonder then, why we are failing in gaining grounds. Without the anointing and the empowerment from the Holy Spirit all our efforts will end up only in failure. The Holy Spirit is no respecter of persons or churches, He will work in and through those who are willing to surrender themselves under His directions…A basic mark of true spirituality is the deep awareness of sin…it is the daily abiding in His holy presence; denying of self but lifting up Jesus and walking in the power of the Spirit. Let us pray to the Lord for deeper experience of His empowerment from above,” chilai hi. Blessings!

About the Author: Pu (L) Tualluai tapa; August 1995 in BA zou, Delhi tung; October 13, 1997 in Asstt. Grade, Ministry of Finance (Exp) nuai ah mu, sem ngal; December 28, 1998 in Ms. Chingliankim toh Pastor Chinkhotuan khut zang in EBCC Bungmual ah nupa suak zou. December 2005 in EBC Annual Assembly ah Rev Luaichinthang khut ah Hattuom upa hi diingin thau nilhna tang. June 23, 2006 in UPSC ah Section Officer in tou panta. Tate: Justin Luaithang (k 7), Mary Luanthianching (k 3).

Articles ZCF, zomi christian, Zomi Christian Fellowship

By Thang Sian Mang

Zomite pen Pasian in hong lamto a, sim leh mal (Kawlgam Vaigam) apan leitung gam mun tuamtuam ah ih teeng khia uhi. Pasian sehsa hiding hiven, cikmah a zong mangmat phaklohna gam (Pakistan) zuan in ko zong ka nupa un kum 2000 May 5 ni-in Delhi pan vanleng tawh ka lengkhia uh a, tua ni zan nai 9 pawlin a khopi uh Islamabad ka tung uhi. Delhi pan vanleng tawh Lahore kitawn a, nai thum sungin Islamabad kitung hi. Mawtaw/meileeng tawh ni khat sungin kitung suak zo hi.

Pakistan cih a khiatna in ‘Holy Land’ (Pak=Holy) ahi hi. Muslim gam ahih manin voksa nek ding genloh a vok mahmah zong kimu mengmeng lo hi. Suai (gold) sangin muh hamsa zaw ci leng kikhial lo kha ding hi. Gam lian lua hilo a, India gam sehli suah sehkhat (1/4) khawng bek pha lel hi. Muslim biakna a zui 97% hi a, Hindu biakna a zui (Sikh leh adgdg tawh kigawm) 1.6% pha in, Christian biakna a zui 1.4% bek pha hi. Urdu leh Punjabi paute kizang phadiak hi. Tua lo-in Sindhi, Baluchi leh Bravi kampaute zong kizang hi. A sum uh Rupee mah kici a, ei sum 100 pen amau a 120/125 tawh kikim hi. Mite lawpluatna mun leh teel masakna mun hi khollo hi. A tangpi in gal gam khat in kiciamteh a, galkap bang hileh J&K ahihke’h North-East (adiak in Manipur/Nagaland/Assam) posting tawh kibang kha ding hi. Sente tawh a kitanauna uh a hoih man leh ih mel-leh-puam kibatna hang mah tawh hong ngaina tuam bilbel uhi. Ahih hangin, ko om hun sung pen India gam tawh kizopna a huaisiat hunlaitak ahih manin ko zum nasemte a ding in nuam lo laklak ah zong nuam lo kholdiak hi. “An eye for an eye” hiam “Tit for Tat” cih bang pian in, khat lamah zum nasem khat kiman hiam ahih keileh kinotkhia hiam om peuh leh, a lang lam te’n zong tua bang mah a kithuk suk pah, kua mawh a kua dik hiam cih kikan nawn tuan lo, a kamsia penpen in thuak kha hiziau lel hi.

India in Pakistan gam ah mission khat ‘High Commission of India’ kici Islamabad khua ah kinei hi. Zum nasem api-atal gawmkhop 110 pha ding a kiseh hinapi in nohkhiatna (PNG/persona non grata) ahih keileh sapkhiatna (recall) cihte hangin kikim sipsip ngeilo hi. A ‘khulang-khang’ in cileng, ka tun kum uh 2000 August kha-in vuak-le-sat thuak man lo in khat hong kinotkhia pah hi. Kha nih zawh ciangin mi khat vuak thuak khin sa-in kinotkhia leuleu hi. Banah, gen tham meello lah ninhuai/huathuai mahmah pawl khat bel – sun hun gentakloh zan kim lai peuh in ‘blank call’ kingah thei zel hi. Kelkong kan peuh leng kua pusuak kua sungtum cih encik ding mi om uh a, i vakna khempeuh ‘bazar’ kaina natawm ah ong sul zuihzuih tazen uhi. Tua bangin kum 2001 mel kimu a, sep ding bangbang sem le bawl a ka om liailiai laitak un 9/11 (September sawm-le-khat) ni a America a ‘World Trade Center’ ki ‘bomb’ na hang tawh patauhna hong kipan pianpian hi. Tua kum December 13 ni-a ‘Indian Parliament’ kiluh thu leh kum 1999 December kha a Indian Airlines vanleng ki ‘hijack’ thu hang tawh “liamna ma ah ci kitaat” tawh kibang in, tua ‘meima’ dam nailo pen hong nasia gawp ding bang hi. Ani ni-in thu thakthak piang a, kitanauna zong huaisia kholdiak hi. America in Afghanistan sim(attack) ding in hong kithawi a, India kumpi in Pakistan kap suk mai ding geel uh cih khawng tawh kisa vengvung hi. US President George Bush in Pakistante huhna deih ahih manin, “Lawm ut maw, gal ut?” a cih ciangin a President pa un, “Sikha, nang lamah ka pang” cih bang pian in, ‘Talibante’ (tua hunlai a ‘Al Qaeda’ tawh kizom a Afghanistan a ukte) langpan in Americate panpih ding a khensat hi. Cik ciang nawnkhiat in a ki-om tam aw?! ci-in kiging sa in ka om gige uhi. Suitcase ah van guansa in kikoih a, vanleng bang zong kithawi manta hinapi’n a sawtlo in kinawnkhiat ding vai hong theng bilbel hi. Kum 2002 January kha in i kumpite’n a lungkim loh uh lahna in Gam Palaipipa (High Commissioner) sam khia uhi (cikmah in hibang om ngei nailo kici hi). Gam kikawm tuahna vanleng, meileng leh mawtawte khawlsak in om a, Indian satellite channel zong TV ah khahkhiat ding kham(phal lo) uhi. Ko zum nasemte zong alang (50%) hong ciahkik in alang ka om uhi. Inn lam zong phawk man lo-in kisa vengvung hi. Kizopna a huaisiat zawk lai leh kumpite’n nawnkhiat sipsip hong sawm uh a, nek-le-tak bang zong nipikal khat a ding lei kholhsa in kikoih hi.

Tua kum March kha nipi zingsang khat ka lawmnu ‘bazar’ pai dawn ding a inn pan ka kumsuk hiathiat leh, ngaihtak a ‘BOMB’ puak ging khat ka za hi. Koi ah, bang a? ci-a taiphei kawm a ka khuadak phei leh ka building gei ua biak-inn khat ‘International Presbyterian Church’ kici tawlet umna maan (glass) hong kitam zuaizuai in, a sung pan meikhu hong zamkhia ngoingoi hi. Tua kikhopna munah migilote’n ‘grenade’ va lawn lut uh ci-in thuthang kiza hi. A sunga kikhawmte kahna leh maunate kiza a, pawlkhatte sisan kai niaunuau kawm a taikhia ka mu hi. Huh theihna lampi om hiam ci-a ka va naihphei leh ka lawmte khat in, “Va lut laizang ken. Bomb puaksak pa hi ci-in hong ngawh kha ding uhi” hong ci hi. Sawtlo khit nungin, thacing mahmah FBI honkhat a thau/meithal uh tawh tua biak-inn kimkot ah ding dim uhi. Hih biakinn ah a tamzaw ‘foreigner’ kikhawm uhi. Tua ni zingsang a kikhawm pawl in pangkha le ung, a kituakkha ding himai! A munah ‘American diplomat’ khat zi leh a tanu khat tawh sim in mi 5 si uh a, tampi liam uhi. Hibang thupiangte hangin gamdang pawlkhat US, Germany, British cihte in Pakistan ah bitna omlo hi, ci-in a mite lak uah numei-naupangte a gam uah samkik uhi.

Hibang kawm kal-ah April kha zingsang khat zum kah ding a kuan, mawtaw lam naih a ka paiphei leh nakpi tak a huhna ngen a kiko aw’ khat ka za hi. Ka khuadak phei leh Arnold Schwarzenegger ciacia ding ‘mama’ (ISI volunteerte cihna) thum/li te’n ka lawmte khat uh zum kah ding a kuan kimlai man ut lua kisa vok delh in a nungah delh henhan mawk uhi. A phak tak ciang un mancip uh a, a lu tuamsak in, mawtaw (truck) tawh pua khia hiau uhi. Tua mun a om ko pawlte mi guk khawng ka pha uhi. Ahi zongin amah hotkhiat theihna ding lampi omlo ahih manin, cinema ‘last fighting’ et bangin ki-en hekhak lel hi. Nai 7/8 sung thudotna leh gawtna a thuak zawh ciangin inn hong tung hi. A zing ciangin nohkhiatna lai mu a, ni 7 sungin i gam lamah ciangkhut khun sa-in hong ciahsanta hi. Tua ni pen a kuan nunung lam ah ka pankhak manin a tuakkha lo suak hi’ng.

Tua kum mah June kha pawl in ko pawl ka buai henhan leuleu uhi. Kizopna huaisia semsem in, kido taktak ding zah dong a thu hong thang vengvung ciang in, Kumpite’n zong hong nawnkhia ding vanleng bang kisa sa’n koih leuleu uh a, kisa sa a om ding in thupiak kingah hi. Tua bang a kinawnkhiat (evacuate) ding vaihawm a, kiginni (Saturday) natawm nasem a kuan ka lawmte khat mah lampi-ah na pang uh a, gukhia (kidnap) hiau uhi. Nai 7/8 sung ding khawng mah gawtna/sawina leh thudotna a thuak zoh ciangin hong kikhahkhia hi. Inn hong tun ciangin a khe tawh zong ding zolo in, zun-tha ek-tha ding nangawn ngong kawi kawm a paipih ngaingai kul hi. Tua ni kiginni (Saturday) hi a, vakkhiat ni a kizang hinapi in ka pusuah loh ni tawh kituak zenzen. Ni thum khit ciangin PNG puang uh a, lum diatduat sa-in inn lam hong ciahkik hi. Cihmah bangin eilamte’n amau zum nasemte khat Delhi ah man in thudotna nei uh cihthu om ahih manin, a thuak kha hilel hi.

A thuakte lakah ka pang khak loh hangin, lungnuamtak in ki-om hithiat thei tuan lo hi. Hici bang kawmkal ah kum thum bang hong cing in 2003 October 6 ni-in Pakistan ka nusia uhi. Tua zawh a kipan ‘suakta kisa in’, hih article……

Neucik hileh a kithuak kha thei ding hi napi’n tua bang kawmkal ah Pasian in ZCF, Delhi in ‘Silver Jubilee’ a lopna zang thei ding a cidamna hong pia leh hong gualzawhpih ahih manin, A min phat ing. ‘Golden Jubilee’ ciangdong hong mualsuahpih ding zong lamen hang.

Articles ZCF, Zomi, zomi christian

Silver Jubilee Brief Reports

Zomi Chirstian Fellowship, Delhi, kum 25 a cinna 27th February 2007 in Free Church, Parliament Street, New Delhi ah thupitakin lawpna neih a hi. Hih Silver Jubilee lawpna programme zingsang lam 10:30 in kipan a nitak 5:00 p.m. in programme ki zo hi. Evan T.K. Lian leh Mrs. Grace Neihsial ten programme makai hihna siamtak leh nuamtak in ong laksak uhi.

“To God be the Glory” (Psalms 29:2) thupi a zang in Pasian kiangah kipahna tawh hih hun nuamtak in zang ahi hi. Praise and Worship team te makaihna in mipi paikhawmten Pasian Phatna nuamtak in neih ziah ziah khit ciangin, Rev.G.K. Joshua, Pastor, ZCF in Jubilee honna thumna nei in, Makai masa te, Advisor , Pastor tuam tuam te leh tulel a fellowship tuam tuam makai 25 ten Jubilee dak 25 vei khetna leh meivak 25 vakna nei in hun pat ahi. Tua khitin Jubilee slogan Upa N. Thang za Khen makaih na tawh Pasian thupha ngetna leh Jubilee tungtawn a suahtakna lakna hun mipi in kiko zuazua in awng ziah ziah uh hi. Hih Jubilee tungtawn ah suahtakna leh nopna, kithutuahna leh damna te ong omna ding in mipi te Pasian minin thupha ki pe ziah ziah hi.

Vaidawnna leh ZCF, Delhi, hong kiphuh khiat zia leh Pasian in ZCF a makaih zia ZCF Chairman, Mr. G. Swan Za Lian in genna nei hi. Aman a gena a, Pasian makaihna kia bek tawh kum 25 mel kimu thei ahihmanin, Pasian thupi na teng teng I Pia hi, ci hi. A gen toh zelna ah , hih fellowship tungtawn in mi 8 full-time a ding kipia uh a, tulel in missionary mi 5 ki vak hi ci hi. Member 400 val pha in, Pasian hehpihna tawh hih Fellowship in mailam nawt to zel ahihmanin, Pasian a muanhuai dan gen pi in nei hi. Hih Fellowship a pat in Fellowship dang dang 7/8 inn tuan khia in, tu in Mother Church suakta hi. ZCF in Zo Pau tuam tuam a Pasian bia in phat ahihmanin, Fellowship dang te tawh a kibat lohna khat ahi hi zong ci hi.

ZCF, Delhi, a kiphutkhiat nung a kipan hih ni tan a ana phamsa te phawk gige Mr. Khakhai Zou, Vice Chairman makaihna tawh neih ahi. Makai/member a na phamsa te Pu.N. Gouzagin,Ex-MP, Pu Thangkhanpau Guite(Advisor),Dr. Hempao Lhungdim(Chairman) Rev. Khup Za Go(Pastor), Mrs. Mary Simte Bajaj(Executive Member), Tg. Kaizalian(Member), Tg.Thangkhanlian(Member), Tg. Kap Do Nang te ahi uhi. Amaute itna leh phawk tawntungna in minute khat daidide in mipi in hun zang hi.

Delhi a Church/Fellowship tuam tuam om te, EBC, EOC, NTBC, Gangte Christian Fellowship, Kuki Worship Service, Vaiphei Christian Fellowship, Hmar Christian Fellowship, Manipur Christian Fellowship, Church of Christ etc in hih jubilee a uap banuah amau lapawl hoihtak tak tak hong sa in, Jubilee nuam sak mah mah uhi. Tua banah ZCF Calcutta, ZCF Guwahati a pat in hih Jubilee lawpna ong uap thei uh hi. Lapawl ngaih nop mah mah ZCF Choir, Hmar Christian Fellowship, Vikaspuri Prayer Cell, Evangelical Baptist Convention Church, Vaiphei Christian Fellowship, Kuki Worship Service, Manipur Christian Fellowship ten Pasian phatna in siam tak in sa chiat banah, la siam tak tak Lia-le-Tang, Lianpi, Chochong, Seasonal Winds, David & Thianching, Care and Concern Ministry, The Jewels, Ms. Florence leh a dang dang ten zong Pasian phatna la ngaih tak tak sa uh hi. Tua kia hilo in Recitation Tg. Go Sawm leh Lia Liannu a pat in ngaih khiat in om hi. Lia Liannu Psalm 119 pumpi gen a hihmanin, Zo Khuak computer nei na hihmanin, Pasian in thupha tampi ong pia sem sem hen ciin Upa Thang Za Khen kiko khe zua zua hi. Lia leh Tang ten Jubilee a ding a la phuah giat uh sa in lam tawh hong lak uhi. Hih Jubilee a ding in la thak thum kiphuak a, Rev. G.K. Joshua in a phuah “Halleluiah” cih ZCF Choir in sa uhi. A dang la kiphuak te pen, Vikaspuri Zomi Prayer Cell leh Lia leh Tang te sak ahi hi.

ZCF, Delhi, in Missionary tulel in nga support a, tua te lakah ah 3 a kihel uh a, amauten zong Mission Field Report na nei uh hi. Pastor K.C. Thomas in Punjab Nission Field Report pia a, Evan Totong in Delhi Mission Field Report piakna nei hi. Pasian gama ding a a sepna thu uh, zak ciangin, mipi ong tha thosak mah mah hi. Mission Board in Missionary love-gift Rs.1000/- ciat piakkhiatna zong nei uh hi.

Hih hun in, Pu V. Dongzathang, IRS (Retd.), Founder Chairman in thugen na nei hi. Tua banah, Rev. Patrick Motilal, Pastor, Free Church, Pu K. Kipgen, IAS(Rtd.), Rev. Raja Singh, IEM, Dr H.T. Sangliana, M.P. (Lok Sabha) leh a dang dang ten zong thugenna neih ban uah Jubilee Greetings mun tuam tuam a pat in tampi muh in om hi.

Silver Jubilee Souvenir Board in Souvenir “Rock of Ages” cih honna Pu Dongzathang, IRS (Retd.), Founder Chairman, in nei hi. Tua Souvenir sungah thu hoih tampi kigelh ahihmanin, a lei kha khempeuh in manpha sa uhi. Tua banah, ZCF makai a ana pang kha sa te leh ulian zantakhuai tak tak a uap te Mementos piakna zong neih ahi hi.

Hih Silver Jubilee ni in, ana phamsa “Rev. Khup Za Go one time Memorial Award on Outstanding Christian Leadrship and Service” piakna zong nei ahi hi. Hih award pen Rev. Dino L. Touthang, Executive Director, EFICOR & Chairman Unau Joint Christian Fellowship, Delhi kiangah Rev. G.K. Joshua in piak khiatna nei hi. Tua hun sung in Mrs. Khup Za Go leh a tate zong ong ding khia in mipi mai ah ong om ciangun, mipi paikhawmte nakngekna sak in, mit san liap luap in tampi om uhi. Hih Award kipe pen Citation, Memento leh Rs.5000/- ahi hi.

Khalam annkuang luina Rev. (Dr.) J.M. Paupu, General Secretary, CBCNEI, in nei a, Jeremiah 29:4-14 pansanin Delhi a Zomite Pasian in hong koihna hang pen ginglote lakah Pasian zong a ama deih dan a khosa ding in, ih omna khotang te ettawn tak hi a Pasian thutak hinkhiat pih ding ahi ci in mipi te hanthawtna nei hi. Mipi paikhawmte tou mah mah ahihmanin, Pasian deihbanga om ding hanciamna tawh lungsim bawl in mipi ten sang mah mah uhi.

Lungdam thu puakna Pa Haulienkap, Jt. Secretary in siamtak in ong gen hi. Hih Jubilee a ding tawh kisai a, thu leh la, thumna, sum leh pai hiin deihsak na ong khak teng teng kiangah lungdamthu genseng loh a puak banah, Pasian thupi na a pia hi.

Hun khakna dingin mipi in”Topa Hoih hi, Topa Lian HI” cih sa zua zua in hun sa lo takin Jubilee khakna thuma Rev. Khamkhanchin, Pastor,EBC in nei hi. Tua khit in angkuang luina nei in nuamtak in Zomi Christian Fellowship, Delhi, Silver Jubilee lawpna zou ahi hi. Jubilee lawp sung a ong pai Zo suante leh a dang dang te mi 1000 bang hiding a tuat ahi hi. Hih sung mah a ut dan dan a dawn theih ding in Coffee/Tea/Soup sung nitum in Hindustan Lever a pat in kimu hi. Jubilee programme video coverage hoihtak in kibawl in hawm khiat theihpah ding lam et ahi hi.

Topa’n thupi na, pahtawina teng teng tang ta hen Amen!!

Reports ZCF, Zomi, zomi christian